السبت 16 ديسمبر 2017 05:28 ص

هينا بنستنّا

الأربعاء 11 أكتوبر 2017 10:05 ص بتوقيت القدس المحتلة

هينا بنستنّا
أرسل إلى صديق

أنس إسماعيل

قالوا حجة الرقاصة الأرض عوجة، وقالوا الشيطان بيدخل في التفاصيل، وقالوا الباب بيفوت جمل، وهي حكومة التوافق أجت وأكلت وشربت وتصورت وجاي يا زلام جاي في غزة وطلعنا عمصر، وحماس قالت للجميع مالناش دعوة بإدارة غزة وحكومة الوفاق تتحمل كافة مسؤوليتها.

يا خوفي القصة تطول ونبدأ نفتح في القديم، ونقلب في صفحات المماسك والزلات، وبهيك بدنا سنة سنتين حتى نتنجح المصالحة، العالم وصل كوكب المشتري واحنا بنستنا غزة والضفة يلزقن في بعض عالأقل سياسياً وإدارياً ومعنوياً.

الناس تعبت وانجلطت والفترة الأخيرة كلها قطع في قطع ووقف رواتب وكهرب ومي، وكانت الحجة اللجنة الإدارية فكوها وللآن بندرس خيار رفع العقوبات المفروضة من عباس عغزة، العقوبات اتخذها الرئيس بجرة قلم، خليه يرفعها برضو بجرة قلم، إذا عنجد بالهم في البلد.

دوشني زامور المصالحة ليل نهار، بأفتح الفيس مصالحة عالتلفزيون مصالحة، عالراديو مصالحة، في السوق والسيارة والشغل وتحت المطر وعالبحر، الكل بيزمر وبيغني مصالحة، وعلى أرض الواقع ما نزال ننتظر تحقيق المصالحة.

طيب ارفعوا العقوبات وقبضوا الموظفين وجيبوا حرس الرئاسة يمسك المعبر ولحلحوا الدنيا شوي، نفرح وبعديها خلصوا اجتماعاتكم وتفاهماتكم بهدووء وانفراد، ومعاكم الزمن طويل بس خلي هالبلد تمشي يا حكومة التوافق بيكفي كل يوم فنطيزة في الإعلام تؤثر على الأجواء، يا عمي قامت القيامة واحنا لسا في الأجواء، بدنا نشوف اشي على أرض الواقع، نشفتوا ريقنا.

المصدر: فلسطين الآن